Шымылдықтың артындағы  қарсыластар

Жарылқаушым жар бола гөр деп ішімнен тілеуімді тілеудемін.  Міне күтпеген жерден қызықтың көкесі басталды да кетті. Сахна шымылдығының артында маған бес әйел тікелей қарсы шығып, сен бірінші болып бастамайсың, біз саған мүмкіндік бермейміз. Бізді әлем елі біледі. Сені кім біледі, қазақ елінен басқа. Біздің аты-жөніміз форумның бағдарламасына енген, сен жоқсың! Біз кезегімізді бермейміз. Тоқтат пиғылыңды деп, өздері білетін дұғаларын оқып және басқадай бір нәрселер жасап маған қарай бесеуі бірдей бір нәрселерін бағыттап жатыр. Нағыз жұдырықсыз соғыс та басталып кетті. Мен алғаш ыңғайсыздана барып, есімді тез жидым. Олардың мені адами түрімнен сиқырлау арқылы басқа түрге айналдырамыз дегені жаныма қатты батты. Сахнаның бір шетіне барып Аллаға жалбарынып, Райымбек ата қорғашы мына жалғызыңды дегенімде көзімнен жас ыршып кетті. Есімді жидым, бір қуатты күш бойыма енгендей болды. Мен қайтадан ана бес әйелдің жанына келіп, мен де сендерге көрсетемін. Егер сендер мені надан етсеңдер, менде сендердің ауыздарыңды бір жаққа ал, басқаңды аузыңа әкеліп қоямын деп қалай айтқанымды сезбей қалдым. Ресей т.б. республикадан келген атақтары дардай, аттары мықтылар қатарындағы бес әйел өз әрекеттерін жалғастыруда. Мен білетін мына Алматылық Флора Кимге не керек, ол маған неге қарсы деп іштей ойладым. Бірақ, мына бес қатынның өліспей беріспейтіндері анық еді. Санаулы уақыттан соң шеберлік сеансына шығуым керек. Мына залды келімсектер жалдап алғаны болмаса, өзіміздің медициналық институттікі екеніне қарамастан мына бес келімсек жекелендіріп алғандай, сахнаның музыкалық аспаптарын менің пайдалануыма бергізбеді. Мына музыка аппараттарына жауапты қазақ елі азаматы, көккөз қазақ елінінің байлығымен өмір сүріп, ауасымен дем алып, суына шөлін қандырып, жерін басып тайраңдағаны кең пейіл қазақ халқының арқасы екенін ұмытып, музыкалық  аспапты да өшіріп тастады. Бес емші енді сен сеансыңды музыкасыз жүргізе алмайсың деп мені келекете күліп тұр. Иә, мен музыка құралының көмегінсіз-ақ ем жүргіземін, менің тұла бойыма енген музыкалық үннің санына сендер өмір бойы жете алмайсыңдар дедім. Мыналар менің қуатымды әлсіретіп, ойымды бөлуге тағы да әрекеттерін бастап кетті. Тәуекел аталарым жауынан қайтпағанда, мен мына бес көбелектен сескенгенім ұлт намысы екенін басты міндетім деп санадым да, өзімнің кішкентай магнитофоныма музыкалық дискелерді қосуды көмекші інім Әбдір Темірғалыұлына айттым. Әбдір қосқан алғашқы дискі ғарыштық музыка еді. Бірден Ф.Ким  мына музыка менікі, сен қоспайсың деп шорт айтты. Бұл да үлкен психологиялық соққы болды. Мен де бірден менің музыкамның саны мың бір, маған қалған мыңы да жетеді деп нық айттым. Ол үнсіз қалды. Сахна шымылдығының зал жағынан сеансқа қазақ елінің емшілері Қожалымовтар Зядан мен Түймекүл шығады деп, басқарушы хабарлап та жіберді. Сахна шымылдығы біртіндеп ашыла бастады...

диюлар мен шайтандар қуылған сеанс

Бұл менің халықаралық дәрежедегі тұңғыш сеансым болатын. Сондықтан оның қазақ емшілері алдындағы абыройы мен жауапкершілігі жоғары еді.

Халық емшілері Қожалымовтар Зиядан мен Түймекүл де сахна төрінен көрінгенде залда отырған екі жарым мыңнан артық адамның ішіндегі бір жарым мыңдайы әр елден келген емші, көріпкел, болжаушы, жұлдызшы, сиқыршылар мен дуақандардың бізге көңілдері толмағаны айқын байқалып тұрды. Аттары әлі әйгілі болмаған мына екеуі нендей ерекшеліктерімен бізді таңғалдырмақ, керек болса бұл екеуін енді сахнаға шықпастай етіп қайтарамыз дегендерде болғаны анық еді. Сабырлықпен сахна мәдениетін сақтап, ұлт ерекшеліктері мен батыр бабалардың биік батылдығын көз алдыма елестетіп қасиетті Құран аяттарын оқып  шеберлік емдік сеансымды бастап жібердім. «Көздеріңізді жұмыңыздар, денелеріңізді бос ұстазыңыздар...» – деген менің даусымды залдағылар естіген сәтте отырғандар арасынан трансқа түсіп дыбыс шығарғандар және денелерін қозғалысқа келтіргендер, қолдарын ербеңдетіп қатты айғайға басқандар көбейіп кетті. Барлық өзгерістік құбылыстар көз алдымнан жіпке тізілген ақ моншақтардай болып, теңіз толқынындай  тербеліс берді. Қолымдағы сағатыма қарап қоямын. Өйткені уақыт өлшеулі еді. Құран аятынан кейін жоғары тонды, ерекше жиілікті ғарыштық жүйенің байланысына шығуды мақсат етіп, өз дауысыммен ғарыштық ән толқынына қосылғанымда залдағы құбылыстар әртүрлі көріністер бере бастады. Осы кезде мен өзімді толық билеп және мына залдағыларды өзіме қаратқанымды анық сезгендей сезімде болдым. Менің денемнен алғашқы сескену мен сезіктену кетіп, денеме күш жинала бастағаны айқын басымдылық танытты. Көмекшім Әбдір ініме қазақтың күйлерін қос деп ақырын белгі де беріп үлгердім. Тағы да залдағы биоқуаттық өзгерістер күшейе түсті. Залда орындарынан тұрып, залдағы орындықтардың ортасындағы баспалдақтар мен алдыңғы жағындағы алаңға жиналғандар саны өсе бастады. Бақылаушылар не ойлағанын кім білсін, өзімнің көңіл-күйім көтеріліп келеді. Залдың сол қанатының артқы орындығында отырған ол кездегі Целиноградтық (бүгінгі Ақмолалық) жасы егде, кез-келген жанды менсіне бермейтін, өзін өзге емшілерден жоғары қоятын сары әйел трансқа түсіп, баспалдақпен тәлтіректеп маған қарай төмен түсіп келе жатыр екен. Мен де тышқан аңдыған мысықтай оның әр қадамын аңдып бақылауда болдым. Өте меңмеңшіл өркөкіректігі басым әйелдің, менің торыма ілінгенін біле ме әлде білмей ме ол өзіне ғана аян болғанымен, бірақ та ол өзін-өзі басқару қабілетінен айырылған болатын. Мен ем кезінде пайдаланып тұрған пышақты ұстаған оң қолымды екі рет толық айналдырып, қолымды әйелге қарай бағыттағаным сол еді әйелді магнитше тарта-тарта алдыма әкелдім. Ол әлі өзін басқара алмай тұр. Сол орында тұрғанда қолымды айналдырғанда ол да айнала берді. Залда басқа да ғаламаттық құбылыстық көріністер өте көбеюде. Мен көмекшіме қазақтың күйлерін қос дегенім сол еді, күмбірлеген күй естілгенде залда отырғандар ішінен әртүрлі көріністер байқала бастады. Бұл алдыңғы көріністерден де өзгеше болды. Қысқасы осы залдағы отырғандардың биоқуаттарын реттеп басқару мен денелеріндегі лас қуаттарын толық тазалауда еркін басымдылықты қолыма алғанымды анық сездім. Берілген уақыт жақындағанда музыканы өшіртіп сеанысымды тоқтатып, Құран аятын оқып, батамды жасап көрермендермен  қоштастым да,  залдың пердесінің артына келіп тұрдым. Сеанс қандай болды екен, мыналар маған күлмеді ме деген ойларда санамнан кетпей тұрғанда, бас ұйымдастырушы келіп қолымды алып тұрып: «Жолдас Қожалымов Сіз өте сапалы, жоғары дәрежеде шеберлік сеансін жасадыңыз. Сеансыңыз ғаламат болды. Қазақ халқының емшілік жүйесінің тылсым сырлары құпиясын халықаралық дәрежеде алғаш рет таныстырдыңыз. Сізге табыс тілеймін» – деп, сөзін қысқа қайырды да, келесі емге шығатын емшіні хабарлауға асығыс кетіп қалды. Менің көңіл-күйім қатты көтеріліп, жан-жағыма қарасам баяғы қарсы болған бес әйел емші-көріпкелдерде келіп менің қолымды алып тұрып: «Сізден кешірім сұраймыз, сіздің қасиетіңіз бізді бір орыннан қозғалтпады, көзіміз ештеңені көре алмады. Біз шымылдықтың артында тентек малдай айналдықта жүрдік, қасиетіңізге бас иеміз, сіз  өте мықты адамсыз...» – дегенде ішімнен Аллаға тәубе дедім. Бұл менің Халықаралық дәрежедегі тұңғыш өткізген шипалық сеансым еді.

КЕЛЕСІ  КҮНГІ ГУ-ГУ

Кешегі кешкі шеберлік сеансынан кейін бұрынғыға қарағанда көңіл-күйім көтерілгендей болды. Үйден шығып Халықаралық конгрестің екінші күнінің жиналысына келдік. Бізді көргендердің көбі танымаса да танысындай амандасып, болашағымыздың нәтижесі әлі алда екенін айтып және сіздерді сапалы әрі мәдениетті шеберлік сеанстарыңызбен құттықтаймыз – деп құттықтап жатты.

– “Сіздер керемет сеанстарыңыз арқылы залда отырғандардың биоқуаттарын тазалап, нұр көздері (чакра) қызметтерін бір қалыпқа түсірдіңіздер және денелеріндегі кері қуатты әсерлі күштерді айдап шықтыңыздар”, – деді. Оны қалай білдіңіздер деп едік, олар біздің ортамызда телепаттар мен көріпкелдер бар. Солар сіздердің сеанс кезіндегі барлық құбылыстық өзгерістерді бақылап отырды. Олар бәрін көреді, сезеді, олардың дарындылықтары ғылыми және халықаралық дәрежеде дәлелденген деп сөздерін аяқтады. Біз бұлар не айтып кетті деген ойға келдік. Содан мен мына жағдайды баяндап тұрған ресейлік емшіге: “Сонда сіздің денеден кері қуатты күштер шықты дегенді қалай түсінуге болады?”, – дедім. Ол: “Анығын айтсам, сіздердің сеанс кезінде қара ниетті дуақандар мен сиқыршылар және бақсылардың көмекшісі болған 19 (он тоғыз) диюлар мен 17 (он жеті) шайтанның қуылғанын көріпкелдер анық көрген. Мұндай ғаламатты біз бірінші рет естіп таңғалдық. Сіздің бойыңыздағы құпияны білу мен ашу  мүмкін емес сияқты. Сіз қазақтың әлі танылмаған емшілігі мен ғарыштық ғаламаттық қасиетін бір-ақ күнде оның ішінде жарты сағат уақытта-ақ, алпыстан аса елдің киелі дарындыларына таныта және мойындата білдіңіз, бұл ғаламат қой, ғаламат, – деді. Осы әңгімені естіп тұрғандар бізден көздерін бұрмай, бастарын изеп тұрғанынан басқа амалы қалмады. Көп емші бір-біріне кезек бермей сөйлеп жатты. Іштерінен біреуі  өзбек бақсының: “Менің екі шайтанымды мына қазақ Қожалымов қуып жіберді, әттеген-ай, енді Алматыға келмеймін”, – дегенін естідім деп қарқылдап кеп күлді. Енді бірі: «Кашпировский де, Джуна да, Руцкой де  т.б.  бәрінің қасиеттері бір ғана Қожалымовтарда екен, енді бұнда келмеспіз...» – деп жатыр дегенді  айтып жатты. Бұның қайсысы шын, қайсысы өтірік немесе болжам ба онда ешкімнің анық айтары болмағаны белгілі болатын.

Дегенмен, әншейінде өздерін ұлы әрі мықты санайтын келімсек емшісымақтардің маңдайынан ұмытылмастай бір-ақ ұрған қазақ емшісінің құдіретті қасиеті, осы халықаралық конгреске қатысқандарды таңғалдырып мойындатқаны нағыз шындық еді. Біз Халықаралық конгрестерде шеберлік емдік сеансы бойынша қазақ ұлтының атынан тұңғыш рет шыққан  біздер  Қожалымовтар едік.

Конгресс кезіндегі айтыстар

Бізге конгресс өз бағдарламасы бойынша өтіп жатқандай көрінді. Кешегі кешкі сеанстан кейін маған таңғалғандар мен қасиетімді мойындағандар көбейіп барады. Әр кімнің өз бағасы мен ойлары анық, айқын көріністе айтылуда. Дегенмен, қайсысына сенікі дұрыс немесе бұрыс деп айту сөгеттік болары айқын еді. Тек ғана басты изеп, “иә” дегеннен аса алмадым. “Сіздің бойыңыздағы өте күшті қайталанбас, құдіретті қасиеттер қайдан?”, – деген сұрақтарды бейтаныстардың көптеп қойғанына өзімде аң-таңмын. Менің бойымдағы тылсым күшті өлшейтін құралмен анықтап айтқандай, мыналардың сөздері мені ұзақ ойландырғаны әлі есімде. Ол кезде тәжірибем мен білімімнің аздығы маған ашық аренаға шығып толық түсіндіріп сөйлеуге аздық еткені де рас болатын. Тек ғана көңіл-күйдің көтеріңкілігі менің кемшіліктерімді білдірмей тұрған еді. Осы Конгреске арнайы қатысып өз көзімен көрген сол кезде «Алматы Ақшамы» газетінің бөлім бастығы(бүгінде ф.ғ.д. ҚазҰУ профессоры, Аударма кафедрасының меңгерушісі) Әнуар Сауатұлы аталған газетте шыққан мақаласында: «Алматыда өткен халықаралық конгреске халық емшілері, экстрасеанстар, жәдігерлер, аспан әлемімен тілдесушілер, су астында емдік әдістер қолданушылар т.б. жиналды. Емшілер қабілеттерін, бойдағы емдік қуаттарын көрсетті. Солардың ішінде алғашқылардың бірі болып Зиядан мен Түймекүл Қожалымовтардың шипалы еміне жұртшылық көп жиналды. Жақында ғана Мәскеуде арнайы оқуда болып, өздерінің емшілік қасиеттерін айқын танытып, «Халықаралық емші нұсқаушы» куәлігін алған ерлі-зайыпты Қожалымовтар аят оқу, пышақ, қамшы, т.б. нәрселерді қолданылатын қазақ емшілігінің сан қырлығын көпшілікке дәлелдеп берді...»,  – деп жазды. Біз конгрестен көп нәрсені білдік, үйрендік және өзіміздің теориялық пен тәжірибелік ілімімізды дамытуға жаңа жол ашқан едік.

Конгреске қатысушылар қазақ елінен де әлемге әйгілі қазақ емшілерінің шыға бастағанына таңғалып, мойындап, бастарын шайқап Алматымен қоштасып, өз отандарына аттанған-ды.

Халық емшілері

қауымдастығын құру комитеті

Конгрестегі қазақ емшісінің емдік сеанстағы жетістігі бізді менсінбейтіндерге өте ауыр соққы болса, ал осы конгреске қатысқан қазақ емшілерінің  рухын көтеріп, көңіл-күйлерін асқақтатқандай көрінді маған. Маған: “Емшілер сіз қауымдастық құрыңыз, біз қашанғы шашырап әлде біреулерге тәуелді боламыз, сіздің ұйымдастыру қабілетіңіз бен іліміңіз жетеді”, – деп қолқа салушылар көбейді. Мен келістім. 30-қыркүйекте Ғылым академиясының жиналыс залына екі жүзден аса емшілер, ғалымдар және баспасөз өкілдері қатысқан жиналыс өтті. Өкілдердің дауыс беруімен Республикалық Халық емшілері қауымдастығын құру жөніндегі  алғашқы ұйымдастыру комитетінің құрамы бекітілді, алдағы өтетін Құрылтайға дайындық нақты белгіленді. Ұйымдастыру комитетінің төрағасына З.Қожалымов, төрағаның орын-басарына м.ғ.д., профессор Э.Заркешов сайланды. Осы жиналысқа қатысқандар зор қуанышпен бір-бірімен қимастай қоштасып, қазақ елінде де басқалардағыдай Халық емшілерінің Ассоциациясы құрылса екен деген армандарын айтып, емшілердің тұңғыш Құрылтайына толық қатысатын тілектерін білдіріп өз аймақтарына аттанған-ды.